វិធីចែករំលែក កម្មវិធី ឬហ្គេម ដែលបានទិញ ទៅកាន់ សមាជិកគ្រួសារ ជាមួយមុខងារ Family Sharing

ចាប់តាំងពី iOS 8 មក ក្រុមហ៊ុន Apple បានដាក់ចេញមុខងារមួយឈ្មោះថា “Family Sharing” ដែលអនុញ្ញាតិឱ្យ អ្នកប្រើប្រាស់ ចែករំលែក កម្មវិធីដែលបានទិញ ឬដោនឡូដ ទៅគ្នាទៅវិញទៅមក រវាងសមាជិកគ្រួសារ។ ដើម្បីបើកមុខងារនេះ Apple តំរូវឱ្យ មានម្នាក់ ដើរតួជា មេគ្រួសារ (Family Organizer) បន្ទាប់មក ធ្វើការ អញ្ជើញសមាជិកដទៃ ឱ្យចូលរួមក្រុម ជាសមាជិករបស់ខ្លួន។

ខាងក្រោមនេះ គឺជា លក្ខខណ្ឌ ដែលអ្នកត្រូវដឹង:
– សមាជិកសរុប ដែលអាចចូលជា ក្រុមគ្រួសារតែមួយបាន មិនត្រូវលើសពី 6 នាក់ ហើយម្នាក់ៗ ត្រូវមាន Apple ID ដែលបង្កើតឡើង សំរាប់ហាងកម្មវិធី App Store នៅក្នុងប្រទេសតែមួយ ឧ. Apple ID សំរាប់ ហាងកម្មវិធី App Store នៅកម្ពុជា ដូចគ្នា
– ត្រូវមាន ឧបករណ៍ដែលដើរលើ ប្រព័ន្ធប្រតិបត្តិការណ៍ iOS 8 ឡើងទៅ
– មេគ្រួសារ ត្រូវមាន គណនី Apple ID ដែលភ្ជាប់គណនីធនាគារ (VISA, MASTERCARD…) ដើម្បីអាច ទូទាត់ការចំណាយ ពេលទិញ កម្មវិធី ឬហ្គេម ដោយសមាជិកគ្រួសារ
– រាល់ការទិញ កម្មវិធី ឬហ្គេម ដោយសមាជិកគ្រួសារ នឹងត្រូវបាន គេកាត់លុយ ចេញពី គណនីរបស់ មេគ្រួសារ
– សំរាប់កូនៗរបស់លោកអ្នក អ្នកអាចមានជំរើស បង្កើត គណនី Apple ID សំរាប់កូន ដូចនេះ រាល់ការទិញរបស់ពួកគេ នឹងត្រូវការ ការត្រួតពិនិត្យ និងយល់ព្រម ពីមេគ្រួសារជាមុនសិន ទើបមានប្រសិទ្ធភាព

វិធីអនុវត្ត:

វិធីបើកមុខងារ Family Sharing:

1. ជាដំបូង សូមបើក កម្មវិធី Settings រួចចូលទៅ iCloud។ នៅពីក្រោម ឈ្មោះ គណនី iCloud របស់យើង នឹងឃើញពាក្យថា Set Up Family Sharing។

តែបើឃើញពាក្យថា Family information is not available វិញ អ្នកត្រូវចូលទៅបើក អីុនធើណែតលើទូរស័ព្ទ ជាមុនសិន ដោយចូល Settings-> Cellular-> Cellular Data -> ON។

2. ត្រឡប់មកផ្ទាំង iCloud វិញ បន្ទាប់មក សូមចុចលើពាក្យ Set Up Family Sharing-> Get Started-> Continue-> Continue ដើម្បីបញ្ជាក់ពី គណនី iCloud មេគ្រួសារ ព្រមទាំង កាតចាយវាយ ដើម្បីប្រើប្រាស់ក្នុងការ​ទូទាត់ ការទិញកម្មវិធី ឬហ្គេម។

រួចត្រង់ផ្ទាំង Share your location with your Family រួចរើសយក Share Your Location ដើម្បីឱ្យសមាជិក ក្នុងគ្រួសារ អាចឆែកដឹងទីតាំងរបស់អ្នក នៅក្នុង Find My iPhone។ ការបើកមុខងារ Family Sharing បានសំរេចហើយ។

វិធីបន្ថែមសមាជិក:

3. នៅត្រង់ផ្ទាំង iCloud សូមចុចលើពាក្យថា Add Family Member-> រួចវាយ អីុម៉ែលគណនី Apple ID របស់ សមាជិកចូល រួចចុចប៊ូតុង Send an Invitation ដើម្បីផ្ញើការអញ្ជើញ។

4. បន្ទាប់មក សូមឆែកអីុម៉ែល នៅលើ ទូរស័ព្ទរបស់ សមាជិក ហើយស្វែងរកអីុម៉ែលអញ្ជើញពី Apple។ រួចចុច Get Started-> Accept-> Confirm ដើម្បីចូលរួម។

នៅត្រង់ផ្ទាំង Share Purchase សូមរើសយក Continue-> Share Location ជាការស្រេច។

ចំណែក នៅលើ iPhone របស់មេគ្រួសារ នឹងទទួលបាន អីុម៉ែលមួយ ប្រាប់ថា មានសមាជិកថ្មី បានចូលរួម នៅក្នុង Family Sharing។

វិធីទាញយកកម្មវិធី ឬហ្គេម ពីសមាជិកដទៃ:

5. ជាដំបូង សូមបើក កម្មវិធី App Store រួចចូលទៅ Updates-> Purchased។ ត្រង់ FAMILY PURCHASES សូមចុចលើ ឈ្មោះសមាជិកណាម្នាក់ ដែលអ្នកចង់ ដោនឡូដ កម្មវិធី ឬហ្គេម ដែលគាត់ ធ្លាប់បានទិញ។

សូមរង់ចាំបន្តិច ទម្រាំវាចេញ តារាងកម្មវិធីដែលសមាជិកនោះ ធ្លាប់បានទិញ ឬដោនឡូដ។ រកមើលកម្មវិធីណាមួយ ដែលចង់ដោនឡុដ រួចរើសយក FREE-> INSTALL APP ដើម្បីដោនឡូដ ជាការស្រេច៕




 ប្រភព៖ ioskhmer

---